11-წლიანი ისტორია და ასეულობით პარტნიორი - როგორ იქცა „ციტადელი“ ხარისხის გარანტად
სამშენებლო და სარემონტო მასალების კომპანია ციტადელი ქართულ ბაზარზე ოპერირების 11 წელს აჯამებს.
რეგიონში არსებული მდგომარეობის მიუხედავად, 2022 წელს „ციტადელმა“ მომწოდებელთა არეალი მკვეთრად გაზარდა და ახალი პარტნიორები შეიძინა. ასევე, კომპანიამ აქტიურად განავითარა საიჯარო, საცალო, კორპორაციული, ონლაინ და დისტრიბუციის მიმართულებები. 2022 წლის ერთ-ერთი პრიორიტეტი ელექტრონული კომერციის პლატფორმის შექმნა იყო. ციფრული სერვისების განვითარებამ კომპანიის გაყიდვების მაჩვენებელი საგრძნობლად გაზარდა.
უფრო კონკრეტულად, როგორ აჯამებს კომპანია განვლილ წლებს და რა სამომავლო გეგმები აქვს, ამის შესახებ „ბიზნესპრესნიუსი“ „ციტადელის“ კომერციულ დირექტორს, ლევან გახელაძეს ესაუბრა.
ელექტრონული კომერციის მიმართულების გაძლიერებისა და პარტნიორობის ზრდის გარდა, საინტერესოა, რა სიახლე შესთავაზა „ციტადელმა“ მომხმარებელს 2022 წელს? მით უფრო, რომ ეს პერიოდი შეიძლება პოსტპანდემიურად და ეკონომიკის აღდგენის წლად ჩაითვალოს...
„ციტადელი“ ყოველდღიურად ზრუნავს კმაყოფილი მომხმარებლების ზრდაზე. ამ მიზნით, შეიქმნა ახალი ლოიალობის პროგრამა ჩვენი პარტნიორი სამშენებლო თუ დეველოპერული კომპანიების მობინადრეებისთვის. კერძოდ, კომპანია „გრადას“ მაცხოვრებლები „ციტადელის“ შოურუმში წარმოდგენილ სარემონტო მასალებზე ფასდაკლებით ისარგებლებენ.
ასევე, მნიშვნელოვანი ნაბიჯები გადაიდგა ასორტიმენტის გამრავალფეროვნების კუთხით. თბილისში, აგლაძის 34-ში შეიქმნა ჰიბრიდული სივრცე. ღია და დახურული სავაჭრო ტერიტორია დაახლოებით 10 000 კვ. მეტრს მოიცავს. 2022 წელს „ციტადელმა“ აუთლეტ მაღაზიაც გახსნა.
რა გეგმები აქვს „ციტადელს“ 2023 წელს?
„ციტადელი“ უკვე 11 წელს ითვლის და სამშენებლო-სარემონტო მასალების რეალიზაციის კუთხით ქვეყანაში წამყვან პოზიციებს ინარჩუნებს. ჩვენ ფაქტობრივად ერთადერთი კომპანია ვართ, რომელიც ფუნდამენტური სამუშაოებისთვის საჭირო სრულ სპექტრს აერთიანებს.
2023 წელს, მსგავსად გასული წლებისა, გაყიდვების მაჩვენებლის დინამიკური ზრდა იგეგმება. დაახლოებით 2 თვეში, ქალაქ ბათუმში, ციტადელის განახლებული (იმავე მისამართზე) შოურუმი გაიხსნება. სივრცე ციტადელი PLUS-ის კონცეფციის იქნება და მომხმარებელს კომპანიაში არსებულ სრულ ასორტიმენტს შესთავაზებს.
2023 წელი აქტიურად დაიწყო, გავხდით Knauf-ის ოფიციალური დილერი საქართველოში და ბაზარს საღებავების ახალი ბრენდი MASTER-ი წარვუდგინეთ.
ჩვენი გუნდის მიზანია, ვიყოთ საიმედო კომპანია პარტნიორებისთვის და სიახლეები ქართულ ბაზარზე სწორედ მათთან ერთად დავნერგოთ.
„ციტადელისთვის“ ერთ-ერთი ასეთი პარტნიორი კომპანიაა „გრადა“, სწორედ მათთან თანამშრომლობით, საქართველოში პირველად, AKA Product Innovation Award-ზე გამარჯვებული უნივერსალური და ინოვაციური საყალიბე სისტემა DUO წარვადგინეთ.
„ციტადელის“ ერთ-ერთი მსხვილი პარტნიორია „გრადა ქონსთრაქშენი“, რომელიც ცნობილია მშენებლობის მაღალი ხარისხითა და სანდოობით.
რა სამომავლო გეგმები აქვს „გრადა ქონსთრაქშენს“ ამის შესახებ სამშენებლო კომპანიის დირექტორის მოადგილეს ნიკა ჭელიძეს ვესაუბრეთ:
რას მოიცავს „გრადა ქონსთრაქშენისა“ „ციტადელის“ პარტნიორობა და რა საერთო პროექტებს შესთავაზებთ მომხმარებლებს?
„გრადა ქონსტრაქშენი“ 6 წელია, რაც ქართულ ბაზარზე არსებობს. ამ ეტაპზე კომპანიამ დაასრულა და მობინადრეებს გადასცა 800 ბინა, რაც ჯამში 46 000 კვ.მ ფართს აერთიანებს. ამჟამად მიმდინარეობს 6 პროექტის მშენებლობა, რომლის ჯამური სამშენებლო ფართი 80 000 კვ.მ.-ია
ჩვენი კომპანიისთვის მთავარი პრიორიტეტი მშენებლობის მაღალი ხარისხი და დათქმულ ვადაში შესრულებაა. ამის გარანტი ის პროდუქციაა, რომელსაც ობიექტებზე ვიყენებთ, მაგალითად გერმანული კომპანია PERI-ს საყალიბე სისტემები, კარ-ფანჯრის მწარმოებელი კომპანია „როტოს“ მასალა, მსოფლიოში ცნობილი გაზობლოკის მწარმოებელი ბრენდის „იტონგის“ ბლოკები, ფინური ბრენდის „კონეს“ ლიფტები და სხვა.
„გრადას“ ობიექტი იყო საქართველოში პირველი, სადაც პარტნიორის ჩართულობით PERI-ს უნივერსალური საყალიბე სისტემა DUO-ს გამოვიყენეთ. მას შემდეგ კი ჩვენი ყველა პროექტი აღნიშნული ბრენდის მასალებით შენდება და სამომავლოდაც ვგეგმავთ, რომ ჩვენი თანამშრომლობა ამ კუთხით გაგრძელდეს.
2022 წელს რა გამოწვევების წინაშე იყავით და როგორ უპასუხეთ მათ?
2022 წელი ჩვენი კომპანიისთვის წარმატებული იყო, რადგან დავიწყეთ ახალი პრემიუმ კლასის კომპლექსის მშენებლობა. პანდემიის შემდგომი პერიოდი აქტიურად წარიმართა და სხვადასხვა რეგულაციიდან გამომდინარე შენელებული სამშენებლო პროცესი სრულად აღდგა.
ვინაიდან სხვადასხვა სამშენებლო და სარემონტო მასალა საქართველოში უკრაინის გავლით შემოდიოდა, საომარი ვითარების გამო წლის პირველ ნახევარში მოწოდების პრობლემები შეიქმნა, თუმცა 2022 წლის მეორე ნახევარში აღნიშნული ვითარება დავასტაბილურეთ.
პროექტების რაოდენობის ზრდასთან ერთად, გვჭირდება ახალი კადრების დასაქმება. ბაზარზე კვალიფიციური კადრების ნაკლებობის გამო, მათ მოძიებაზე უფრო მეტი ძალისხმევის დახარჯვა გვიწევს. აქედან გამომდინარე, კომპანია აქტიურად თანამშრომლობს სხვადასხვა უნივერსიტეტთან, სამშენებლო მიმართულებით სტუდენტების დასაქმებისა და კვალიფიკაციის ამაღლების მიზნით.
„გრადა“ განვითარების ახალ ეტაპზე გადავიდა. ჩვენი თითოეული პროექტი თანამადროვე ტექნოლოგიების გამოყენებით შენდება, რაც საშუალებას გვაძლევს მომხმარებელს მათ შეხედულებებსა და საჭიროებებზე მორგებული საცხოვრებელი, კომერციული თუ საოფისე სივრცეები შევთავაზოთ. ჩვენი მიზანია, თანამედროვე ტექნოლოგიების განვითარებას მაქსიმალურად სწრაფად ავუწყოთ ფეხი და ყველას მივცეთ საშუალება, იცხოვროს მშვიდ და კომფორტულ გარემოში.
დაბოლოს, მინდა აღვნიშნო, რომ მუდმივი მუშაობისა და განვითარების ამ პროცესში „ციტადელი“ ჩვენი საიმედო პარტნიორია. თანამშრომლობის ფარგლებში კომპანია მუდმივად გვაცნობს სექტორში არსებულ სიახლეებს და ცდილობს, დამკვეთზე მორგებული თანამშრომლობის პირობები შემოგვთავაზოს.