მისაღები ოთახის გადაკეთების იაფი და მარტივი ხერხები

სახლში ყოფნისას ყველაზე დიდ დროს მისაღებ ოთახში ვატარებთ. ვმასპინძლობთ სტუმრებს, ვთამაშობთ, ვისვენებთ, ვუყურებთ ტელევიზორს, უმეტეს შემთხვევაში ასრულებს სასადილო და სამუშაო ოთახის ფუნქციასაც.

ინტერიერის დიზაინერთა რჩევით, ხშირად არ არის საჭირო ოთახის ძირეული გადაკეთება, რათა მას ახალი სიცოცხლე შევძინოთ. ზოგჯერ, ავეჯის გადაადგილება და დივანისთვის ახალი ბალიშებიც საკმარისია.

1. იფიქრეთ, როგორც საგამოფენო სივრცეზე

მისაღებს, ისევე როგორც ყველა სხვა ოთახს სჭირდება ცენტრი, საწყისი წერტილი, საიდანაც ინტერიერის მოწყობას დაიწყებთ. შეხედეთ ოთახს, ისე როგორც საგამოფენო სივრცეს, სადაც ყურადღების ცენტრში საუკეთესო ნახატი უნდა ექცეოდეს. თუ თქვენს ფოკუსში ტელევიზორი ან ბუხარია, შესაბამისად, ის ოთახის ყველა კუთხიდან იდეალურად უნდა ჩანდეს და ავეჯიც ასევე, გადაანაწილოთ.

2. საღებავი

საღებავი ერთ-ერთი ყველაზე ეფექტური გზაა ოთახის განახლებისთვის. მნიშვნელობა არ აქვს მხოლოდ ერთ კედელს შეღებავთ, თუ ოთხივეს ოთახის ტრანსფორმაცია თვალსაჩინო გახდება. გამოიყენეთ კონტრასტული ფერები, ან მუქი ნაცრისფერი თეთრი ჩანართებით. თუ მთლიანი კედლის შეღებვა არ გსურთ, ვიზუალური ეფექტის მისაღებად, შეღებეთ კედლის მხოლოდ დაბლა და მაღლა ნაწილები 2-3 მტკაველის სიმაღლეზე.

3. ყურადღება მიაქციეთ იატაკს

არ არის აუცილებელი იატაკის ნებისმიერი განახლება ძვირადღირებული გამოცდილება აღმოჩნდეს. თუ იატაკი დაზიანებული არ არის და ძირფესვიან განახლებას არ საჭიროებს, შეგიძლიათ გამოიყენოთ ხალიჩა. ხალიჩის ცვლილება ნაკლებად შრომატევადი და გაცილებით ბიუჯეტურია, ვიდრე იატაკის საფარის გამოცვლა. თუმცა, თუ არსებული იატაკი დაზიანებულია და ცვლილებას საჭიროებს იხილეთ ჩვენი ბლოგი ,,როგორ დავამონტაჟოთ ლამინირებული იატაკი ჩვენივე ხელით’’.

4. ავეჯი - ყიდვა თუ რესტავრაცია

აღარაფერი რომ არ ვთქვათ, ეკომეგობრულ გადაწყვეტაზე, ახალი ავეჯის ყიდვა უფრო ძვირადღირებულია, ვიდრე მისი რესტავრაცია. გამოიყენეთ ახალი ქსოვილი, შეღებეთ ხის ზედაპირი ან თავიდან გადაუსვით ლაქი.

5. აქსესუარები

ყველაზე მარტივი მეთოდი მისაღები ოთახის გასაახლებლად აქსესუარების გამოყენებაა. ჩაანაცვლეთ ძველი ბალიშები ახლით, შეუხამეთ ფარდებს, ან გადააფარეთ ახალი გადასაფარებელი დივანსა და სავარძლებს. განახლების ეს მეთოდი შეგიძლიათ სეზონურად გამოიყენოთ - ზამთარში თბილი გადასაფარებლები ჩაანაცვლოთ საზაფხულო თხელი და გრილი ზეწრებით. დაამატოთ, ახალი ნახატი კედელს ან ხალიჩა შეცვალოთ.

6. დააკვირდით განათებას

ჩვენ ხშირად გვავიწყდება, რომ განათება უმნიშვნელოვანესია ინტერიერში. ის ქმნის განწყობას, ფერს და სივრცეს სხვადასხვაგვარ ეფექტს ანიჭებს. განათებაზე ბევრი რომ არ გავაგრძელოთ, იხილეთ ჩვენი ბლოგი - განათების მნიშვნელობა ინტერიერის დიზაინში.