საძირკვლის ჰიდროიზოლაციის ძირითადი ტიპები

საძირკველი არის შენობის ის ნაწილი, რომელიც პირდაპირ კონტაქტშია ნიადაგთან და მუდმივად განიცდის გრუნტის წყლების, ტენიანობისა და ატმოსფერული ნალექების ზემოქმედებას. სწორედ ამიტომ, საძირკვლის ჰიდროიზოლაცია არის ერთ-ერთი ყველაზე მნიშვნელოვანი ეტაპი. ეს არის სისტემა, რომელიც განსაზღვრავს შენობის გამძლეობას, უსაფრთხოებასა და ხანგრძლივობას. 

მნიშვნელოვანია სწორი ჰიდროსაიზოლაციო მასალების არჩევა, რათა თავიდან ავიცილოთ ტენიანობა და სოკოს გაჩენა, რას საბოლოო ჯამში კონსტრუქციის დაზიანებას იწვევს. 

საძირკვლის ჰიდროიზოლაცია იყოფა ორ ძირითად ტიპად: ვერტიკალურ და ჰორიზონტალურ ჰიდროიზოლაციად.

ვერტიკალური ჰიდროიზოლაცია - იცავს საძირკვლის ზედაპირებს გრუნტის წყლებისა და ნიადაგის ტენიანობისგან. გამოიყენება რულონური, წასასმელი ან მემბრანული მასალები, ასევე ზოგჯერ მოითხოვს დამცავი ფენის დამატებას, როგორიცაა სადრენაჟე მემბრანა და გეოტექსტილი. შესაძლებელია ამ მასალების კომბინირებულად გამოყენება, რაც ზრდის ჰიდროიზოლაციის გამძლეობას გარე ზემოქმედებისგან.

ჰორიზონტალური ჰიდროიზოლაცია - ხელს უშლის ტენიანობის კედლებში გავრცელებას. თავსდება საძირკველის ფუძის ქვემოთ და მის ზედა ნაწილში, კედლების დაწყებამდე. ჩვეულებრივ გამოიყენება რულონური მასალები ან სპეციალური მემბრანები.

ჰიდროიზოლაციის ძირითადი ტიპები

საძირკველის ჰიდროსაიზოლაციოდ გამოიყენება რამდენიმე ტიპის ჰიდროსაიზოლაციო მასალა. ყველაზე მოთხოვნადია რულონური, წასასმელი და მემბრანული სისტემები.

რულონური ჰიდროიზოლაცია განსაკუთრებით ეფექტურია საძირკვლის ვერტიკალური და ჰორიზონტალური დაცვისთვის. აღნიშნული მეთოდი მოიცავს ბიტუმო-პოლიმერული ბაზის მასალებს, რომლებიც არმირებულია მინატილოთი, მინაქსოვილით ან პოლიესტერით.

საძირკველზე რულონური ჰიდროიზოლაციის დაგებამდე აუცილებელია ზედაპირის დამუშავება ბიტუმის პრაიმერით, რომელიც ზრდის მასალის ადჰეზიას და უზრუნველყოფს უკეთეს წებოვნებას ბეტონთან.

ვერტიკალურ ზედაპირებზე რულონი იგება ქვემოდან ზემოთ, 10-15 სმ გადაფარებით. ჰორიზონტალურად კი საძირკველის ფუძისა და კედლების შეერთების ადგილზე რულონს აგებენ ცალკე ფენად, რათა თავიდან იქნას აცილებული ტენიანობის გავრცელება კედლებში.

უპირატესობები: მაღალი წყალგაუმტარობა; გამძლეობა მექანიკური ზემოქმედების მიმართ; ხანგრძლივი ექსპლუატაციის ვადა (20–30 წელი); იდეალურია მაღალი გრუნტის წყლების დონის პირობებში.

თხევადი ჰიდროიზოლაცია ქმნის უწყვეტ დამცავ ფენას, რომელიც იდეალურად ავსებს ბზარებს, ნაპრალებს და რთულად მისაწვდომ ადგილებს. განსაკუთრებით ეფექტურია საძირკვლის შიდა მხარეს, სარდაფებში და კუთხეებში. მასალა უნდა იქნას დატანილი მინიმუმ ორ ფენად, ასევე მნიშვნელოვანია კუთხეებში და შეერთებების ადგილებში გამოყენებული იქნას ჰიდროსაიზოლაციო ლენტი დამატებითი გამაგრებისთვის.

მემბრანული სისტემები საძირკველისთვის თანამედროვე და განსაკუთრებით ეფექტური გადაწყვეტაა. კერძოდ, HDPE, PVC, EPDM და TPO მემბრანები, რომლებიც განკუთვნილია ღრმა საძირკველების, სარდაფებისა და მაღალი გრუნტის წყლების პირობებში გამოსაყენებლად, იქ სადაც დატვირთვა დიდია და შესაბამისად საჭიროა მაღალეფექტური და პრემიუმ ტიპის ჰიდროიზოლაცია.აღნიშნული ტიპის ჰიდროიზოლაცია მოითხოვს შესრულების თანამედროვე სტანდარტებს, შესაბამისად რულონურ და წასასმელ ტიპის ჰიდროიზოლაციასთან შედარებით მემბრანული უფრო ძვირადღირებულია.

 

სწორად შერჩეული მასალა და პროფესიონალურად შესრულებული ჰიდროიზოლაცია დაიცავს თქვენს შენობას ათწლეულების განმავლობაში.