ძველი ავეჯის განახლება - ნაწილი I საფარის მოცილება

ალბათ ხშირად გაგიგიათ ადამიანებისაგან, რომ მათი ახალი ან გარემონტებული ბინის ფონზე, ავეჯი, რომელიც წინა დიზაინში ჰქონდათ, მოძველებული ეჩვენებათ და გამოცვლა ან ინტერიერთან მორგება სურთ. 

სანამ ახალი ავეჯის ყიდვას გადაწყვეტთ, გიზიარებთ რამდენიმე რჩევას, რომელიც ძველი და ახალი დიზაინის შერწყმაში დაგეხმარებათ.

ავეჯის გადაღებვით ან ვიზუალური დეტალების დამატებით თქვენი ძველი ნივთების გადახალისებას შეძლებთ. თუ DIY გიტაცებს და გიყვარს საკუთარი ხელით საინტერესო დეტალების გაკეთება, მაშინ მიყევი ჩვენს რჩევებს:

ძველი ნივთების გაახლება:

როგორც წესი, ხის ავეჯი და ნივთები (კარი, ფანჯარა, დარაბა და მსგავსი) დაფარულია საღებავით ან ლაქით. ასეთი ნაკეთობების გაახლებისათვის პირველ რიგში აუცილებელია ძველი საფარის მოცილება. საღებავის და/ან ლაქის საფარის მოცილების რამდენიმე მეთოდით შეგიძლიათ:

მექანიკური დამუშავება:

პირველადი დამუშავებისთვის შეგიძლიათ გამოიყენოთ ლითონის საფხეკი, ზუმფარა ან შპატელი. ასევე სამუშაო სპეციფიკაციიდან გამომდინარე შეგიძლიათ გამოიყენოთ შედარებით არატრადიციული გზა და ძველი ზედაპირი მინით აფხიკოთ. ზუმფარის გამოყენების შემთხვევაში სასურველია თავდაპირველად ძველი ზედაპირის მოსაშორებლად მსხვილი ზუმფარა გამოიყენოთ, ხოლო პირველადი ფენის მოშორების შემდგომ, ზედაპირს დასამუშავებლად გამოიყენეთ შედარებით წვრილი ზუმფარა.

მექანიკური დამუშავების ერთ-ერთ სახეს ელექტრო ხელსაწყოების გამოყენებით დამუშავება წარმოადგენს, აღნიშნული გზა სხვა მეთოდებთან შედარებით ბევრად კომფორტული და სწრაფია. ელექტრო სახეხის გამოყენება ერთი ორად გაგიმარტივებთ პროცესს და ბევრ დროსა და ენერგიას დაგაზოგვინებთ.

ქიმიური დამუშავება

გარდა მექანიკური დამუშავებისა შეგიძლიათ მიმართოთ ქიმიურ გზასაც, რაც გულისხმობს ზედაპირის დასაფარად გამოყენებული მასალის ქიმიური ზემოქმედებით დაშლას და შემდგომ სხვადასხვა საშუალებებით მოცილებას. სანამ გადაწყვეტთ ქიმიურად ზედაპირის დამუშავება უმჯობესია კონსულტაცია პროფესიონალთან გაიაროთ, რადგან არასწორად შერჩეულმა საღებავის მომცლელმა შეიძლება მთლიანი ავეჯი დაგიზიანოთ.  

თერმული დამუშავება 

საღებავის ან ლაქის საფარის მოშორება საკმაოდ მარტივად შეგიძლიათ ტექნიკური ფენის გამოყენებით. ტემპერატურის ზემოქმედებით შეგიძლიათ გააცხელოთ და დაარბილოთ ზედაპირი, ზოლო შემდეგ შპატელით ან სხვა ხელსაწყოების გამოყენებით მარტივად მოაცილებთ არასასურველ ფენას. 

*გაითვალისწინეთ - ტექნიკური ფენის გამოყენების შემთხვევაში სასურველია დაიცვათ ცხვირი და თვალები, რათა ლაქის გაცხელებისას არ გამოიწვიოს რაიმე სახის უკურეაქცია.

გარდა ზემოთ განხილული მეთოდებისა, ასევე არსებობს ზედაპირის ქვიშის ჭავლის გამოყენებით დამუშავება. ქვიშის ჭავლით საღებავის და/ან ლაქის მოცილება საკმაოდ ფაქიზი პროცესია და საჭიროებს მაღალ სიზუსტეს, წინააღმდეგ შემთხვევაში შესაძლებელია საფარის ქვეშ განთავსებული ზედაპირის დაზიანება. ხშირად ქვიშის ნაცვლად იყენებენ სოდასაც. 

ზედაპირის დამუშავების შემდეგ უკვე შესაძლებელია შემდეგ ეტაპზე გადასვლა და გასუფთავებული ავეჯისთვის ახალ დიზაინზე ფიქრი. თუმცა სანამ შეღებვას დაიწყებდე აუცილებლად დაელოდე ჩვენი ბლოგის მეორე ნაწილს, სადაც შეღებვისას გასათვალისწინებელ აუცილებელ რჩევებსა და რეკომენდაციებს გაგიზიარებთ.

თვალი ადევნე ციტადელის ბლოგს და #გაარემონტეგონივრულად ჩვენთან ერთად.