სახლის გარემონტება-გადაკეთებასთან დაკავშირებული 5 მითი

იდეალური სახლის აშენებაზე ყველა ვოცნებობთ, თუმცა, მისი ახლის აშენების თუ ძველის გადაკეთების პროცესი არც ისე მარტივია. როცა ძველის გადაკეთებას ვირჩევთ, მნიშვნელოვანია გავითვალისწინოთ ყველა დეტალი და გავთვალოთ ყველა ნაბიჯი ისე რომ, შეცდომა ძვირად არ დაგვიჯდეს.

,,სახლის გადაკეთება ახლის აშენებაზე რთულია’’-ო ამბობენ, რადგან მოითხოვს ძირეულ შემოწმებას, გაუძლებს თუ არა სახლის საძირკველი გადაკეთების პროცესს. განსაკუთრებით მაშინ, თუ მეორე სართულის დამატებას აპირებთ. დროთა განმავლობაში ნებისმიერი მასალა ცვდება, დაზიანების აღმოჩენის შემთხვევაში დაგჭირდებათ გამაგრებითი სამუშაოები დაზიანებული კერების აღმოსაფხვრელად.

 

 

როგორც ბევრ სხვა საკითხთან დაკავშირებით, არსებობს სახლის გადაკეთებასთან დაკავშირებული შემდეგი მითები:

მითი 1: სახლის გადაკეთება ზრდის მის საბაზრო ღირებულებას.

ახალი მასალების გამოყენება გადაკეთების პროცესში, ოთახების დამატება ნამდვილად ზრდის სახლის ფასს, მაგრამ არა მის საბაზრო ღირებულებას. ერთადერთი გამართლება, რაც შეიძლება სახლის გადაკეთებას მოეძებნოს არის საკუთარი კომფორტისთვის მისი სათანადოდ მორგება და ახალი მასალებით განახლება. მაგალითად, მდგრადი, ადვილად საწმენდი ლამინირებული იატაკის დაგება, რომელიც არ იკაწრება და მდგრადია წერტილოვანი ზემოქმედების მიმართ და სხვ.

 

 

მითი 2: თუ შენ თვითონ გააკეთებ, დაზოგავ ფულს.

თანხის დაზოგვის მიზნით, სახლის გარემონტების მსურველთა ნაწილს სჯერა, რომ მათ თავად შეუძლიათ გაარემონტონ სამზარეულო ამ საქმის პროფესიონალის გარეშე, შეღებონ ნესტისგან დაზიანებული კედლები დაზიანებული კერის სათანადო დამუშავების გარეშე, ან გადააკეთონ აბაზანა, ისე რომ ძველი, დაჟანგული მილები არ შეცვალონ და სხვ. სინამდვილეში კი, აღნიშნული შეცდომების გამოსწორება გაცილებით ძვირი ჯდება, ვიდრე პროფესიონალის მომსახურება.

 

 

მითი 3: სახლის გადაკეთება ყოველთვის კარგი იდეაა.

ის, რამაც თქვენთვის გაამართლა, არ გულისხმობს იმას, რომ სხვებისთვისაც გაამართლებს. სანამ გადაკეთებას დაიწყებთ, ყოველთვის კარგი იდეაა, რჩევა ამ საქმის პროფესიონალს ჰკითხოთ, რომელიც შეამოწმებს რამდენად ექვემდებარება ან გაუძლებს თქვენი სახლი გადაკეთების პროცესს.

 

 

მითი 4: განახლება-გადაკეთების პროექტები ძვირადღირებული და დროში გაწელილია.

განახლება-გადაკეთების პროექტები მოითხოვს კვლევას და დაგეგმვას. ამიტომაც, აუცილებელია ეს საქმე პროფესიონალებს ანდოთ. არქიტექტორ-დიზაინერები განსაზღვრავენ ბიუჯეტს, შექმნიან საჭირო ნახაზებსა და 3D ვიზუალს, შეადგენენ მოსახერხებელ დროით ცხრილს, გაუწევენ კონტროლს პროექტის მიმდინარეობას და გათვლიან შემდგომ ეტაპებს.

 

 

მითი 5: ტრენდული და ძვირადღირებული მასალები იზიდავს მომხმარებლებს.

ბევრ ადამიანს სჯერა, რომ სახლის გადაკეთება-გარემონტებისას ძვირადღირებული პროდუქციის გამოყენება უკეთესია. სინამდვილეში კი, მთავარი ხარისხია და ერთადერთი, რაც თქვენს სახლს ღირებულებას შესძენს მისი ჰიდრო, თბო და ხმის საიზოლაციო სისტემებით აღჭურვა და ენერგო ეფექტურობის გაზრდაა.

შევეცადეთ იმ მითებზე გაგვემახვილებინა ყურადღება, რომლებიც უფრო გავრცელებულია და მოგვეცა გასათვალისწინებელი რჩევები იმ შემთხვევაში, თუ სახლის გარემონტება-გადაკეთებას ფიქრობთ.